Një grup anëtarësh të Klubit të Patriotëve të Rinj zhvilluan një vizitë përkujtimore në Varrezat Monumentale të Kllogjerit, ku nderuan me respekt dhe përulësi viktimat e genocidit të egër ballkanik. Mes heshtjes së rëndë të vendit dhe pranisë së simbolikës së dhimbjes historike, të rinjtë u përfshinë në një akt kujtese që dëshmon përkushtimin e tyre ndaj historisë së Çamërisë dhe drejtësisë historike.

Pas kësaj ndalese domethënëse, grupi udhëtoi drejt Konispolit për të hapur një ekspozitë dedikuar personaliteteve më të shquara të Çamërisë, të cilët me veprën dhe jetën e tyre kanë lënë gjurmë të pashlyeshme në historinë kombëtare. Kjo ekspozitë, e realizuar dhe dhuruar nga Fondacioni Çamëria “Hasan Tahsini”, iu dorëzua Shkollës së Mesme të Bashkuar “Bido Sejko”, si një formë edukimi dhe frymëzimi për brezat e rinj.

Aktivitete të tilla janë thelbësore për ruajtjen e kujtesës kolektive dhe për forcimin e identitetit çam. Ato shërbejnë si ura lidhëse mes të kaluarës dhe së ardhmes, duke ngulitur në mendjet e të rinjve vlerat e krenarisë, qëndresës dhe kontributit çam në historinë shqiptare.