Ekspozita fotografike “Mos harro” – Durrës, 21 qershor 2024

Pas ndalesave në Tiranë, Skënderaj, Vlorë dhe Fier, ekspozita itinerante “Mos harro” mbërriti më 21 qershor në Durrës, në një nga zonat më të gjalla të qytetit – Shëtitorja Taulantia (Vollga), ku qëndroi e hapur për publikun nga ora 18:00 deri në 21:00.

E konceptuar si një ekspozitë në hapësirë publike dhe e aksesueshme për të gjithë qytetarët, “Mos harro” solli në Durrës një koleksion fotografish dokumentare, që dëshmojnë krimet dhe gjenocidin ndaj shqiptarëve në Çamëri më 1944 dhe në Kosovë më 1999. Përmes pamjeve të fuqishme dhe përshkrimeve të sakta historike, ekspozita i ftoi qytetarët të ndaleshin, të reflektonin dhe të njihnin më nga afër të kaluarën e dhimbshme të kombit.

Shëtitorja u shndërrua për disa orë në një hapësirë ndërgjegjësimi, ku e kaluara fliste me gjuhën e imazhit për të nxitur një kujtesë kolektive që refuzon të harrojë. Ekspozita përcolli një mesazh të qartë dhe të fortë: të mos harrojmë është një akt drejtësie dhe detyrim ndaj brezave që vijnë.