Më 12 qershor 2026, në ambientet e Kinemasë së Pallatit të Kulturës “Labëria” në Vlorë, u zhvillua premiera e filmit dokumentar “Më çoni në Qafë të Botës të shoh ÇAMËRINË!”, një produksion i Fondacionit Çamëria “Hasan Tahsini”, kushtuar kujtesës historike dhe identitetit të shqiptarëve të Çamërisë.
Aktiviteti u organizua nga Fondacioni Çamëria “Hasan Tahsini”, në bashkëpunim me Shoqatën Patriotike “Çamëria” – Dega Vlorë, duke mbledhur në një sallë qytetarë, intelektualë, studiues, përfaqësues të shoqatave patriotike, si dhe shumë dashamirës të çështjes çame.
Dokumentari, me skenar të Luan Ramës dhe regji të Pandeli Çeços, sjell një rrëfim të ndërtuar mbi dëshmi autentike, kujtime personale dhe materiale dokumentare, duke udhëhequr publikun në një udhëtim emocional drejt Çamërisë. Përmes historive njerëzore dhe pamjeve domethënëse, filmi rikthen në vëmendje dramën e shqiptarëve të Çamërisë, duke theksuar rëndësinë e ruajtjes së kujtesës historike, identitetit kombëtar dhe kërkimit të drejtësisë për të drejtat e mohuara.
Gjatë premierës, të pranishmit vlerësuan dokumentarin si një kontribut të rëndësishëm në dokumentimin dhe promovimin e historisë së Çamërisë, duke e cilësuar atë një vepër që ndërthur emocionin me faktin historik dhe që shërben si një mjet i rëndësishëm ndërgjegjësimi për brezat e rinj.
Shfaqja në Vlorë u mirëprit nga publiku, i cili e përcolli dokumentarin me interes dhe emocion, duke konfirmuar edhe një herë rëndësinë e nismave kulturore dhe dokumentare që mbajnë gjallë kujtesën kolektive dhe promovojnë të vërtetën historike për Çamërinë.
camiko.al
